ყოფილი დირექტორი განაჩენის მოლოდინშია

ბათუმის წყალკანალის ყოფილი დირექტორი _ ვლადიმერ მიქელაძე გაწეული სამუშაოებისთვის აჭარის მთავრობის თავმჯდომარემ 2007 წლის ივლისში ქების სიგელით დააჯილდოვა. ჯილდოს მიღებიდან ერთ თვეში კი მის მიმართ სამართალდამცავებმა სისხლის სამართლის საქმე აღძრეს. ბრალდების მტკიცებით, ვლადიმერ მიქელაძემ იცოდა წყლის დაბინძურების შესახებ და მოსახლეობას ინფორმაცია არ მიაწოდა, ანუ ადამიანების სიცოცხლე საფრთხეში ჩააგდო.

2007 წელს, 16-დან 25 ივნისის ჩათვლით, ბათუმის ინფექციურ საავადმყოფოში რამდენიმე ადამიანი მოხვდა. ექიმებმა ყველას ერთი და იგივე `სავარაუდო დიაგნოზი _ წყლის ინფექცია~ დაუდგინეს.
წალკანალის დირექტორს სასამართლომ აღკვეთ ღონისძიებად გირაოს _ 25 ათასი ლარის გადახდა შეუფარდა, რის საფუძველზე იგი წინასწარი პატიმრობიდან გაათავისუფლეს. სისხლის სამართლის კოდექსის 247-ე მუხლის (წყალკანალის ყოფილ დირექტორს ამ მუხლით ასამართლებენ) თანახმად, `იმ ფაქტის ან მოვლენის შესახებ ინფორმაციის დამალვა, რომელიც საფრთხეს უქმნის ადამიანის სიცოცხლეს, ჯანმრთელობას ან გარემოს, ისჯება ვადით სამიდან შვიდ წლამდე~. 
საქმეში დაზარალებული ორი ბავშვი და სამი ქალია. `ამ პერიოდში იმავე დიაგნოზით რაიონებიდანაც იყვნენ პაციენტები ინფექციურში მოთავსებული. რაც შეეხება მიქელაძის მიერ ინფორმაციის დაფარვას, ჩვენ ტელევიზიაში მოვიპოვეთ მტკიცებულება, რითაც დასტურდება, რომ ბრალდებულმა მოსახლეობას მოუწოდა ერიდონ სასმელი წყლის გამოყენებას გადადუღების გარეშე, რადგან წყალი დაბინძურებულია და სიცოცხლისთვის საშიშია~, _ ამბობს განსასჯელის ადვოკატი _ რამინ პაპიძე. 
პაპიძის ინფორმაციით, აჭარის ტელევიზიამ დაცვის მხარეს მიწერა, რომ ეს ინფორმაცია `დაზიანებულია და არ ინახება არქივში~; თუმცა კადრები აჭარის ტელევიზიიდან გამოძიებამ მოიპოვა და საქმეშიც დევს, როგორც ბრალდების მტკიცებულება. `25~-ე არხმა კი დაადასტურა, რომ ამ პერიოდში წყალკანალის დირექტორმა ნამდვილად განაცხადა წყლის დაბინძურების შესახებ.  
აჭარის ტელევიზიიდან ამოღებული ვიდეოფირი 2007 წლის ივნისის თვეშია ჩაწერილი. ფირის მიხედვით ოქმში წერია, რომ წყალკანალის დირექტორმა _ ვლადიმერ მიქელაძემ, სოფლის მეურნეობის სამინისტროს სურსათის უვნებლობის სამსახურის უფროსმა _ რამაზ სურმანიძემ, აჭარის ჯანდაცვის მინისტრმა _ მამუკა ნაკაშიძემ და დაავადებათა კონტროლის ერთიანი ეროვნული ცენტრის ხელმძღვანელმა _ პაატა იმნაძემ მოსახლეობას აცნობეს: `წვიმის შედეგად წყალი მღვრიეა და ამიტომაც არის გადაკეტილი~.
ქსელში წყლის გაშვების შემდეგ ზემოთ მითითებული ყველა ჩინოვნიკი მოუწოდებს მოსახლეობას, მხოლოდ გადადუღებული წყალი მიიღონ~. 
რაც შეეხება დაზარალებულებს, სასამართლო პროცესზე მათ განაცხადეს, რომ იმ პერიოდისთვის ტელევიზორისთვის არ უყურებიათ და წყლის დაბინძურების შესახებ ინფორმაცია არ ჰქონდათ. წყლით ინფიცირებაზე, ანუ ~სავარაუდო დიაგნოზი~ დაზარალებულებს ექიმებმა დაუსვეს.  
სასამართლოზე დაიკითხა ჩაქვის წყალსადენის სათავე ნაგებობის ინჟინერი _ რეზო დიდმანიძე, რომელმაც თქვა, რომ ვლადიმერ მიქელაძემ დაბინძურებული წყლის შესახებ ინფორმაცია მოსახლეობას ტელევიზიით მიაწოდა. იგივე ინფორმაცია დაადასტურა სურსათის უვნებლობისა და მასზე ზედამხედველობის სამსახურის უფროსმა _ რამაზ სურმანიძემ. 
იყო თუ არა სასმელი წყალი დაბინძურებული იმ პერიოდისთვის ბათუმში? ჩატარებული ექსპერტიზით დადასტურდა, რომ სასმელი წყალი ნამდვილად იყო დაბინძურებული. განსასჯელის ადვოკატი ექსპერტიზას არაკანონიერს უწოდებს `რადგანაც აჭარის სოფლის მეურნეობის სამინისტროსთან არსებული სურსათის უვნებლობის ზედამხედველობის სამსახურს და მასთან არსებული ლაბორატორიების თანამშრომლებს არ ჰქონდათ შესაბამისი აკრედიტაცია. ანუ მათ არ ჰქონდათ წყლის სინჯების მოპოვებისა და ლაბორატორიული გამოკვლევის უფლება, რასაც დაეყრდნო ექსპერტიზა~. 
წინასწარი გამოძიება დასრულებულია. საქმეს ბათუმის საქალაქო სასამართლოს მოსამართლე _ თემურ ქათამაძე განიხილავს. მომდევნო სასამართლო პროცესზე ლაბორატორიის თანამშრომლები დაიკითხებიან.
წყალკანალის დირექტორი ბრალდებას უარყოფს. 

~ხოფის~ ბაზრობის დირექტორებს განაჩენი გამოუტანეს

სავაჭრო ცენტრ შპს ~ბათუმი~-ის (ე.წ. ხოფის ბაზრობა) დირექტორებს, ილია ანანიძესა და ჯონი ზოიძეს ბათუმის საქალაქო სასამართლოს მოსამართლე, დავით გელაშვილმა, განაჩენი გამოუტანა. გელაშვილმა ანანიძეს _ ცხრა, ზოიძეს კი ხუთი წლით პატიმრობა მიუსაჯა. ადვოკატმა განაჩენი გაასაჩივრა. 

~ხოფის ბაზრობის~ წილები ასეა გადანაწილებული: ბაზრობის 50 პროცენტი შპს ~ანანურის~ საკუთრებაა, რომლის მეწილეები ილია, გურამ და ედუარდ ანანიძეები არიან. შპს ~განთიად 94~ მფლობელია 28,5 პროცენტის, რომლის მესაკუთრე ასლან აბაშიძის და, ნარგიზ აბაშიძეა. ბათუმის მერია (რევოლუციის შემდეგ აჭარის ფინანსთა სამინისტრო) _ 20 პროცენტს ფლობს, ხოლო 1,5 პროცენტი ჯონი ზოიძის საკუთრებაა.
1997-1999 წლებში ბათუმის მერიამ ბაზრობიდან გადასახადებისა და კუთვნილი წილის გარდა 352 ათასი ლარი მიიღო. რადგან მერიას ბაზრობის ვალი მართებდა, 2004 წელს ბაზრობის პარტნიორთა კრებამ გადაწყვიტა, რომ დივიდენდებიდან შესული თანხა მერიისთვის მანამ არ მიეცათ, სანამ ვალი არ ამოიწურებოდა. კრებაზე ასევე გადაწყდა, რომ ეს თანხა ბაზრობის კეთილმოწყობას მოხმარდებოდა.
განსასჯელ ილია ანანიძის ძმამ, ყოფილმა მოსამართლემ, დავით ანანიძემ სასამართლო პროცესზე განაცხადა, რომ პარტნიორთა კრების გადაწყვეტილების შესახებ თავის დროზე ქალაქის მერიასაც ეცნობა: `თუ ამ გადაწყვეტილებას მერია არ ეთანხმებოდა, მას უფლება ჰქონდა იგი გაესაჩივრებინა. ეს ასე არ მოხდა. ახლა დირექტორები (მათ შორის დავით ანანიძის ძმა _ ავტ.) პარტნიორთა კრების გადაწყვეტილების შესრულებისთვის დააკავეს. ისინი ვალდებულნი იყვნენ კრების გადაწყვეტილება შეესრულებინათ. ეს გადაწყვეტილება დღესაც ძალაშია და ის არავის გაუუქმებია. გამოდის, თანხას ძალით გვართმევენ~.
2005 წელს მერიამ თავისი წილი აჭარის ფინანსთა და ეკონომიკის სამინისტროს გადასცა საკუთრებაში. სამინისტრომ კი მოითხოვა, რომ 1999 წლამდე წარმოშობილ ვალს იურიდიული ძალა აღარ ჰქონოდა და 2002-2005 წლებში დაგროვილი დივიდენდები სახელმწიფოს გადასცემოდა. დაიწყო სასამართლო დავა. 
როგორ მიითვისეს განსასჯელებმა ფინანსთა სამინისტროს თანხა? საბრალდებო დასკვნის მიხედვით, `2005 წლის ივნისიდან 2008 წლის 30 ივნისამდე ილია ანანიძემ და ჯონი ზოიძემ სამსახურებრივი მდგომარეობის გამოყენებით მიითვისეს ფინანსთა და ეკონომიკის სამინისტროს კუთვნილი 304 459 ლარი~. 
ჯონი ზოიძეს სხვა რამეშიც ედება ბრალი: `მან ჩაიდინა სამეწარმეო საქმიანობა სპეციალური ლიცენზიის გარეშე, რასაც თან ახლდა დიდი ოდენობით _ 120 364 ლარი შემოსავლის მიღება 2005 წლიდან 2008 წლის 1 ივლისამდე~. მას ასევე ბრალად ედება ყალბი საგადასახადო დოკუმენტების დამზადება გასაღების მიზნით: 2005 წლის 2 ოქტობერს საგადასახადო ინსპექციიდან მიღებული 15 ცალი ანგარიშფაქტურიდან 14 ცალი 2005 წლის 30 სექტემბერს შეავსო, ხოლო ერთი 28 სექტემბერს, ანუ ძველი თარიღით. 
`ეს არის დაინტერესებული პირების მიერ შეთხზული სისხლის სამართლის საქმე. დღემდე პატიმრები არავის დაუკითხავს~, _ განაცხადა ბოლო სასამართლო პროცესზე ლევან მამულაძემ, რომელიც განსასჯელების ინტერესებს იცავს. მისივე თქმით, განსასჯელთა წინააღმდეგ საბრალდებო დასკვნაში მოყვანილი ფაქტები, ფაქტობრივად, არ არსებობს: `გაუგებარია, რას გულისხმობს წინასწარი გამოძიება ტერმინში: `წინასწარი შეთანხმებით ჯგუფურად, მართლსაწინააღმდეგოდ, სამინისტროს კუთვნილი 304 459 ლარის მითვისება~. თუ სიტყვა `კუთვნილში~ იგულისხმება შპს სავაჭრო ცენტრ `ბათუმი~-ს დამფუძნებელთა მიერ სამინისტროსთვის მისაცემი 304 459 ლარის დივიდენდი, მაშინ ლაპარაკი უნდა იყოს მისაცემი თანხის არმიცემაზე და არა იმაზე, რომ განსასჯელებმა მიითვისეს სხვისი ქონება. ამ მუხლს გადასახადებისგან თავის არიდება ჰქვია და არა _ თანხის მითვისება~. 
ადვოკატის განმარტებით, ბაზრობა კანონის დარღვევით შეამოწმეს, ანუ 2008 წლის 6 აგვისტოს `ხოფის ბაზრობა~ შეამოწმეს საქართველოს ფინანსთა სამინისტროს შემოსავლების სამსახურის სპეციალური მოკვლევის სამსახურის ექსპერტიზის დეპარტამენტის განსაკუთრებით მნიშვნელოვან საქმეთა სამმართველოს ინსპექტორებმა და არა საგადასახადო ინსპექტორებმა. შესაბამისად, შემოწმება ჩატარებულია არაუფლებამოსილი პირების მიერ კანონის დარღვევით. შემოწმება ჩატარდა მოსამართლის ნებართვის გარეშე. 
ადვოკატის განმარტებით, `პარტნიორებისთვის თუნდაც თანხის მიუცემლობა არის სამოქალაქო დავის საგანი და არ შეიძლება იგი განხილულ იყოს, როგორც სისხლის სამართლის დანაშაული, მით უფრო, როგორც სხვისი ქონების მითვისება. ამ შემთხვევაში კი საუბარია არა ქონების განზრახ მითვისებაზე, არამედ ერთ-ერთი პარტნიორის _ ბათუმის მერიის 1996-1997 წლებში ზედმეტად წაღებული თანხების გამოქვითვაზე, რომელიც დასტურდება საქმეში არსებული დოკუმენტებით. განზრახვა იმისა, რომ მოტყუებით ან სხვა ხერხით ვინმე აპირებდა ამ თანხის მითვისებას, არ არსებობს. საკითხი გადაწყვიტა უფლებამოსილმა პარტნიორთა კრებამ. საქმეში არსებული დოკუმენტებით დასტურდება ის ფაქტიც, რომ ბათუმის მერიამ თავის დროზე ზედმეტი თანხა წაიღო. ეს ინფორმაცია სასამართლოს აქვს~.
საქმეში არსებული ერთ-ერთ მტკიცებულებად მაკონტროლებლების მიერ შედგენილი აქტი მიიჩნევა, რის საფუძველზეც ფინანსთა სამინისტრო აცხადებს, რომ მას პატიმარი ბიზნესმენებისგან 304 459 ლარი ეკუთვნის. ადვოკატს მიაჩნია, რომ აქტის უტყუარობა ვერ დაადასტურეს სასამართლო პროცესზე მოწმის სახით დაკითხულმა მაკონტროლებლებმა. მოწმემ, ბიძინა ბიძინაშვილმა _ აქტის ერთ-ერთმა ავტორმა, სასამართლო პროცესზე განაცხადა, რომ საქმის შესწავლის დროს ისინი მოქმედებდნენ სახელმწიფოს ინტერესებიდან გამომდინარე და საკითხის შესწავლისას უპირატესობა სახელმწიფოს მიენიჭა. კითხვაზე, თუ რატომაა აქტში უამრავი შეცდომა დაშვებული, მან უპასუხა: `ეს შესაძლებელია გამოწვეული იყოს საანგარიშო მანქანების მიერ~.
`საქმის განხილვისას წარმოდგენილი იყო აუდიტის დასკვნა, რითაც დადგინდა, რომ აქტში მოცემული ციფრები ხელოვნურადაა გაზრდილი 30 000 ლარით, _ ამბობს განსასჯელების ადვოკატი. _ სასამართლო ექსპერტიზის ეროვნულმა ბიურომ ვერ დადო დასკვნა, რადგანაც აქტში შეტანილი ციფრები და დოკუმენტები არასაკმარისად ჩათვალა. საქმეში არსებული მასალებით რევიზიის აქტში შეტანილი მონაცემების უტყუარობა არ მტკიცდება, ამის გამო აქტი საეჭვო მტკიცებულებაა~.
საბრალებო დასკვნაში წერია, რომ ჯონი ზოიძემ მიითვისა ფინანსთა სამინისტროს კუთვნილი დივიდენდები _ 449 ლარი. საქმეში არ არსებობს დოკუმენტი, რომ ჯონი ზოიძემ ფინანსთა სამინისტროს ეს თანხა მიითვისა ან რატომ არის ეს თანხა განსაკუთრებით დიდი ოდენობის.
ზოიძე შპს `ბათუმის~ დირექტორად 2006 წლის აპრილში დაინიშნა. ადვოკატისთვის გაუგებარია, რა დოკუმენტებზე დაყრდნობით ამტკიცებს გამოძიება, რომ იგი 2005 წელში იყო დირექტორი ან ფირმის მეწილე. მას ამ ფირმის პარტნიორთა კრების გადაწყვეტილებაში მონაწილეობა არ მიუღია, ამიტომ იგი 2005 წელს ილია ანანიძესა და თეიმურაზ კომახიძეს ვერ შეუთანხმდებოდა სახელმწიფოს ქონების დატაცებაზე. 
ბიზნესმენების ადვოკატის თქმით, გაუგებარია კონკრეტულად ილია ანანიძემ სამინისტროს რამდენი ლარი მიითვისა. 
გაურკვეველი დარჩა: რომელი სამსახურებრივი მდგომარეობის გამოყენებით შეძლეს განსასჯელებმა ფინანსთა სამინისტროს ქონების დატაცება, რადგანაც საქმეში არ დევს დოკუმენტები ამ პერიოდში ვინ სად მუშაობდა; როგორ შეიძლება ყოფილიყო სადავო თანხა ილია ანანიძისა და ჯონი ზოიძის მართლზომიერ მფლობელობაში ან განმგებლობაში, ვინ მიანდო მათ ეს საქმე.
როგორ მიითვისეს განსასჯელებმა ფინანსთა სამინისტროს სადავო თანხა? 
ვინ რა ოდენობის ზიანი მიაყენა დაზარალებულებს?

სასამართლომ ინსპექტორები დაკითხა

ზურაბ ბერიძის სასამართლო პროცესზე, 13 ივნისს, ბრალდების მოწმეები _ ელდარ მაწკეპლაძე და ომარ ცაცუა დაკითხეს. რევიზია ფინანსთა სამინისტროს შემოსავლების სამსახურის ბათუმის რეგიონულ ცენტრში, რომლის ხელმძღვანელიც ზურაბ ბერიძე იყო, მათ ჩაატარეს. 

ზურაბ ბერიძის ადვოკატის, თემურ გოგსაძის ინფორმაციით, ელდარ მაწკეპლაძისა და ომარ ცაცუას (შემოსავლების სამსახურის სპეციალურ გამოკვლევათა და ექსპერტიზის სამმართველოს მთავარი ინსპექტორები) ჩვენება ერთმანეთის იდენტურია: `მოწმეებმა სასამართლო პროცესზე განაცხადეს, რომ არც ერთი საწარმოო არ შეუმოწმებიათ. მათ მიერ გაკეთებული რევიზიის აქტი დაეყრდნო მხოლოდ საგადასახადო ინსპექციაში არსებულ მონაცემებს და გენერალური ინსპექციის ანგარიშში მითითებულ დოკუმენტს. მათ ასევე აღიარეს, რომ რევიზიის აქტში თუ აღმოჩნდება პირველადი საბუღალტრო დოკუმენტაცია, შეიძლება თანხა შემცირდეს კიდევაც~.  
დამოუკიდებელი, ანუ კანონით დადგენილი ექსპერტიზა ამ საქმეზე არ ჩატარებულა. ადვოკატის განმარტებით, შიდაუწყებრივი შემოწმება და რევიზიის აქტები, მოქმედი კანონმდებლობით, არ შეიძლება საფუძვლად დაედოს სისხლის სამართლის საქმეს. 
მომდევნო სასამართლო პროცესზე დაცვის მოწმეებს დაკითხავენ. `სახელმწიფო ბრალდებამ სასამართლოში წარადგინა ახალი მტკიცებულებები მეწარმე სუბიექტებთან მიმართებაში. შესაბამისად, ჩვენ საჩივრებისა და სასამართლო გადაწყვეტილების _ მეწარმე სუბიექტების დარიცხვების გასაცნობად ვადა ვითხოვეთ. სასამართლომ ბევრი მეწარმე სუბიექტის სარჩელი დააკმაყოფილა, ანუ დარიცხვები უკანონოდ მიიჩნია.  
საქართველოს ფინანსთა სამინისტროს შემოსავლების სამსახურის ბათუმის რეგიონული ცენტრის უფროსი, ზურაბ ბერიძე შვიდი თვის წინ დააკავეს. დოკუმენტში (ბრალდებულის სახით პასუხისგებაში მიცემის დადგენილება), რომლის საფუძველზეც ზურაბ ბერიძე დააპატიმრეს, წერია, რომ ბათუმში მოქმედმა 19-მა სხვადასხვა შპს-მ და ხუთმა ინდივიდუალურმა მეწარმემ სახელმწიფოს ერთი მილიონი ლარი აზარალა. ხოლო სამსახურმა, რომელსაც ზურაბ ბერიძე ხელმძღვანელობდა, ეს ფირმები არ შეამოწმა. 
მომდევნო სასამართლო პროცესი 26 ივნისს გაიმართება. საქმეს ბათუმის საქალაქო სასამართლოს მოსამართლე _ ვერა დოლიძე იხილავს, საქმის პროკურორი კი _ ანზორ უსტიაძეა.

მსოფლიო რეკორდი ბათუმში

ოზურგეთელმა, გოდერძი მახარაძემ 16 ივნისს ბათუმში მსოფლიო რეკორდი დაამყარა. 36 წლის მსოფლიო რეკორდსმენმა თავით ბურთის კენწვლით კიბეზე 110 საფეხური აიარა. მანამდე კი 1500-ჯერ აკენწლა ბურთი რვა წუთსა და 45 წამში. მსოფლიო რეკორდის დამყარებისთვის დრო ათი წუთი იყო განსაზღვრული.  
კომისიის წევრები აჭარის ავტონომიური რესპუბლიკის განათლების, კულტურისა და სპორტის სამინისტროს წარმომადგენლები იყვნენ. 
გოდერძი მახარაძემ უკვე ჩვიდმეტი რეკორდი დაამყარა, აქედან პირველი 1996 წელს. რეკორდსმენი მომავალში დუბაიში ბურთის კენწვლით ყველაზე მაღალ შენობაზე ასვლას აპირებს, რომელიც რვაასი მეტრო სიმაღლისაა. 
მსოფლიო რეკორდსმენს ბათუმის მერიამ საჩუქრად სამასი ლარი გადასცა.  

გენერალი კობალაძე დაკავების დღიდან შიმშილობს

7 მაისის შემდეგ, როცა მუხროვანის ამბოხში ბრალდებულ კობა კობალაძეს აღკვეთი ღონისძიება შეუფარდეს, პატიმარი ციხეში შიმშილობს. `მხოლოდ წყალს იღებს და ითხოვს უკანონო პატიმრობიდან გათავისუფლებას~, _ ამბობს მისი ადვოკატი, ემზარ პაქსაძე.
ადვოკატის თქმით, კობალაძეს დაკავების შემდეგ 30-40 კილოგრამი აქვს წონაში დაკლებული: `ძალიან შეცვლილია. მიუხედავად ამისა, ჯერჯერობით გადაადგილება შეუძლია, იმყოფება ექიმების მუდმივი მეთვალყურეობის ქვეშ. ის ამბობს, რომ მზადაა ბოლომდე იბრძოლოს, რათა მისი ხმა გაიგონ იმათ, ვინც ის უკანონოდ დააკავა~.  
ამ საქმეში ერთადერთი მტკიცებულება არსებობს: ეჭვმიტანილ გია ღვალაძის ჩვენება, რომელშიც ის ამბობს, რომ კობა კობალაძეს შეხვდა მცხეთაში, რესტორან `არაგვში~. 
ემზარ პაქსაძე: `ჩვენ რესტორნის თანამშრომლები დავკითხეთ. მათ დაადასტურეს, რომ ამ პერიოდში კობა კობალაძე რესტორან `არაგვში~ არ უნახავთ. ასევე `მაგთიკომიდან~ მოვიპოვეთ ინფორმაცია და წარვუდგინეთ გამოძიებას, რომლითაც დასტურდება, რომ იმ დროს კობალაძე მცხეთაში არ ყოფილა და იგი ქუთაისში იმყოფებოდა. ეჭვი გვაქვს, გია ღვალაძე ვერ აცნობიერებს რეალობას.  
2007 წელს ღვალაძეს ავტოავარია შეემთხვა და 49 დღე კომაში იყო. როგორც ექიმებმა გვითხრეს, 49-დღიანი კომის შემდეგ შეუძლებელია რაიმე სახის ფსიქიკური გადახრები არ გამოვლინდეს ადამიანში. ამიტომაც მოვითხოვთ გია ღვალაძეს სამედიცინო ფსიქიკური ექსპერტიზა ჩაუტარდეს. ის გლდანის მერვე საპყრობილეში იმყოფება~.
ადვოკატის ინფორმაციით, კობა კობალაძის ერთ-ერთი ძმა დღესაც ოსებს ჰყავთ ტყვედ, ხოლო ერთი ძმა აფხაზეთის ომში დაიღუპა. კობალაძეს ოთხი შვილი ჰყავს.

ფინანსთა სამინისტროს მაღალჩინოსნის სასამართლო

ფოტოზე ზურაბ ბერიძე

ზურაბ ბერიძეს ბიუჯეტის სასარგებლოდ მილიონ ლარს სთხოვენ

6 ივნისს ბათუმის საქალაქო სასამართლოში ზურაბ ბერიძის საქმის განხილვა დაიწყო. საქართველოს ფინანსთა სამინისტროს შემოსავლების სამსახურის ბათუმის რეგიონული ცენტრის უფროსი შვიდი თვის წინ დააკავეს. დოკუმენტში (ბრალდებულის სახით პასუხისგებაში მიცემის დადგენილება), რომლის საფუძველზეც ზურაბ ბერიძე დააპატიმრეს, წერია, რომ ბათუმში მოქმედმა 19-მა სხვადასხვა შპს-მ და ხუთმა ინდივიდუალურმა მეწარმემ სახელმწიფოს ერთი მილიონი ლარი აზარალა. ხოლო სამსახურმა, რომელსაც ზურაბ ბერიძე ხელმძღვანელობდა, ეს ფირმები არ შეამოწმა.

ნათია როყვა

6 ივნისს მოსამართლემ _ ვერა დოლიძემ განსაჯელის ადვოკატების: თემურ გოგსაძისა და პაატა ბოლქვაძის შუამდგომლობები განიხილა და მხოლოდ შვიდი მოწმის დაკითხვის შუამდგომლობა დააკმაყოფილა. დანარჩენებს `უსაფუძვლობის გამო~ უარი ეთქვათ. ვიდრე მოსამართლე შუამდგომლობების განხილვას დაიწყებდა მას განსასჯელმა დარბაზში მუშაობის პირობების შექმნა სთხოვა. `ჩანაწერები მინდა გავაკეთო და მუშაობის პირობები შემიქმენით~, _ თქვა სასამართლო დარბაზში გისოსებს მიღმა მყოფმა ზურაბ ბერიძემ. ამაზე მოსამართლემ განაცხადა: `ეს ჩემი კომპეტენცია არაა, ბადრაგებმა გადაწყვიტონ~.
ბადრაგებმა განსასჯელს ადვოკატების მაგიდასთან დაჯდომის უფლება მისცეს. განსასჯელი პროფესიით იურისტია და სასამართლო პროცესზე საკუთარ არგუმენტებსა და მოსაზრებებს აფიქსირებდა, რაც ოქმში იწერებოდა. `ჩემი მუშაობის დროს სახელმწიფო ბიუჯეტი ასი მილიონი ლარით გადაჭარბებით შესრულდა, ამის დამამტკიცებელი დოკუმენტები არსებობს. მინდა პროკურატურას გამოძიებაში დავეხმარო~, _ განაცხადა სასამართლო დარბაზში ზურაბ ბერიძემ. 
ადვოკატები: თემურ გოგსაძე და პაატა ბოლქვაძე რამდენიმე მოწმის დაკითხვას ითხოვდნენ, ზოგიერთი მათგანი ყოფილი თანამდებობის პირია, რამდენიმეს კი დღესაც უკავია თანამდებობა. ენვერ სირაბიძე, ელდარ ვარშალომიძე, ბესარიონ ბაჯელიძე, ლაშა მახარაძე, ვახტანგ ქავთარაძე, ალექსანდრე როდინაძე, გრიგოლ გობეჯიშვილი, ირაკლი სირაძე, კობა აბულაძე და სულიკო ფუტკარაძე _ ამ მოწმეების დაკითხვას დაცვის მხარე ითხოვდა, ამათგან სასამართლო მხოლოდ შვიდ მოწმეს დაკითხავს. წინასწარი გამოძიების დროს დაკითხულმა ორმა მოწმემ კი (ელდარ მაწკებლაძემ და ომარ ცაცუამ), ჩვენების მიცემაზე უარი განაცხადეს, ანუ მოსამართლეს სთხოვეს, რომ იხელმძღვანელონ `წინასწარ გამოძიებაში მიცემული ჩვენებით~. ამ ორი მოწმის შუამდგომლობა მოსამართლემ სასამართლო დარბაზში წაიკითხა, რასაც ზურაბ ბერიძემ კომენტარი გაუკეთა: `ჩემს უმოქმედობას ადგილი არ ჰქონია და სასამართლოს ამას დავუმტკიცებ. სრული პასუხისმგებლობით ვაცხადებ, მოწმეები, რომლებიც თავს არიდებენ სასამართლოში გამოცხადებას, ცრუ და ყალბი ჩვენება მისცეს გამოძიებას~. 
ზურაბ ბერიძის ერთ-ერთი ადვოკატი _ თემურ გოგსაძე ამბობს, რომ საქმეში უზუსტობები არსებობს, ამიტომ დამოუკიდებელი ექსპერტიზის ჩატარებასა და, შესაბამისად, მტკიცებულებების წარდგენას სასამართლოში აპირებს. ადვოკატის თქმით, არსებობს ზურაბ ბერიძის მოადგილის, ელდარ ვარშალომიძის ჩვენება, რაც განსასჯელის უდანაშაულობას ამტკიცებს, თუმცა `საბრალდებო დასკვნაში იგი გამოყენებული არ არის~.
თემურ გოგსაძე: მას შემდეგ, რაც ზურაბ ბერიძეს ბრალად სამსახურებრივი მოვალეობის ბოროტად გამოყენება დასდეს, დაახლოებით 7 თვე გავიდა. თუ ამ ადამიანის წყალობით ბიუჯეტს მილიონი ლარი დააკლდა, დღემდე რატომ არ შეამოწმეს ის ფირმები, რომლებმაც ბიუჯეტს ეს თანხა დააკლეს?
საქმე ისაა, რომ არც ერთ მეწარმეს დავალიანება არ გააჩნია. ჩემი ინფორმაციით, მათ გაასაჩივრეს საგადასახადოს ეს გადაწყვეტილება, ანუ ის, რომ თითქოს მათ ბიუჯეტს ფული დააკლეს. არ მინდა შევეხო კონკრეტულ ინდმეწარმეებს, მაგრამ სასამართლოში ამ მტკიცებულებებს წარვადგენთ~.
ზურაბ ბერიძე აღნიშნულ სფეროში 2004 წლიდან დაკავებამდე მუშაობდა. ბრალდებული ამ თანამდებობაზე ზურაბ ნოღაიდელის პრემიერ-მინისტრობის დროს დაინიშნა და ყოფილი პრემიერის კადრად მოიაზრებოდა. ბრალის დამტკიცების შემთხვევაში მას სამ წლამდე პატიმრობა ემუქრება.
პირველ სასამართლო პროცესს სამოცამდე ადამიანი ესწრებოდა. დანარჩენებმა დარბაზში შესვლა უადგილობის გამო ვერ მოახერხეს. 

თემურ გოგსაძე _ ზურაბ ბერიძის ადვოკატი

_ ბატონო თემურ, ბრალდების ერთ-ერთ ნაწილში წერია: `შპს ~რეგინას~ საბაჟოზე დაფიქსირებული მონაცემებით, 2005 წელს ექსპორტზე გატანილი აქვს 175 834 ლარის ღირებულების საქონელი, ამავე წლის დეკლარაციაში ერთობლივი შემოსავალი დაფიქსირებულია _ 159 948 ლარი. ე.ი 161886 ლარით ნაკლები, რაც ზურაბ ბერიძემ არ შეამოწმა... ~ ეს რას ნიშნავს? 
_ ელემენტარული არითმეტიკაა: წერია, რომ დეკლარაციებში სხვაობა არსებობს, 175 ათასს 159 ათასი გამოაკლეს და მიიღეს რა? _ 161886-ი. ეს ისაა, რაზეც მე ვდაობ. ამ საკითხზე არანაირი ექსპერტიზა არ ჩატარებულა. აქედან გამომდინარე, საბრალდებო დასკვნის მიხედვით რაიმეს მტკიცება აბსურდია.  
_ ბრალდების დადგენილებით გადასახადების შემცირებას შპს `მერკურსაც~ ედავებიან. ~მერკურის~ ხელმძღვანელმა კი `ბათუმელებთან~ განაცხადა, რომ სამი წლის წინ დეკლარაციაში დაშვებული შეცდომა, ზურაბ ბერიძის დაკავებამდე დიდიხნით ადრე გაასწორეს (ბიუჯეტს სასარგებლოდ მოგების გადასახადი დაერიცხათ), რის შესახებაც საგადასახადოს მიწერეს კიდეც. ბრალდების ამ ნაწილს როგორ შეაფასებთ? 
_ საუბარია არა საბუღალტრო თუ საბაჟო დოკუმენტაციაზე, არამედ მხოლოდ დეკლარაციებზე, რაც საგადასახადო ინსპექციაში იქნა წარდგენილი. პირველადი დოკუმენტები, რაც შესაბამისი ექსპერტიზებისთვის აუცილებელია, სისხლის სამართლის საქმეში არ დევს. 
ე.წ. ~ექსპერტიზა~ კი, დეკლარაციების მიხედვით ჩატარდა. ეს ექსპერტიზაც თვითონ შემოსავლების სამსახურმა ჩაატარა ანუ ამ სამსახურის ექსპერტიზის კვლევის ცენტრმა. იუსტიციის ან სხვა რომელიმე დამოუკიდებელი ექსპერტიზა არ ჩატარებულა და, შესაბამისად, მასალები საქმეში არ დევს.
ხარვეზები დეკლარაციებში, რასაც ესა თუ ის მეწარმე აბარებს საგადასახადოს, შესაძლებელია ძირითადი ბუღალტრული დოკუმენტაციის მეშვეობით გასწორდეს. ასე მოხდა `მერკურთან~ დაკავშირებითაც, თუმცა ეს არავის შეუსწავლია, არ გამოუძიებია და რეალობა არ დაუდგენია. ამიტომ სასამართლოს ჩემს მტკიცებულებებს წარვუდგენ.
_ ის, რასაც ზურაბ ბერიძეს ედავებიან (შემოწმების ჩატარებას), საგადასახადო კოდექსის მიხედვით რამდენად არის ფინანსთა სამინისტროს შემოსავლების სამსახურის ბათუმის რეგიონული ცენტრის უფროსის კომპეტენცია?  
_ ნებისმიერ სამსახურში კომპეტენციები დებულების მიხედვით ნაწილდება. ასე იყო ამ სამსახურშიც: ზურაბ ბერიძის მოვალეობებში უშუალოდ შემოწმების პროცედურა არ შედიოდა, ის სამსახურის ხელმძღვანელი იყო. მისმა მოადგილეებმა თუ სამმართველოების ხელმძღვანელებმა (ამაზე ვალდებულმა და უფლებამოსილმა პირებმა) ახსნეს, დაასაბუთეს და წარუდგინეს კიდეც შემოსავლების სამსახურს, თუ რატომ იყო შეუძლებელი ამ ფირმების შემოწმება იმ ვადაში, რომელიც დაუწესა მათ ზემდგომმა. ამ დოკუმენტის არსებობის მიუხედავად, რატომღაც ზურა ბერიძე მაინც პატიმრობაშია. 
_ სისხლის სამართლის საქმე ზურაბ ბერიძის ყოფილი მოადგილეების მიმართაც ხომ არ აღძრულა? 
_ არა, ისინი დაკითხეს. მაგალითად, ელდარ ვარშალომიძის ჩვენება საბრალდებო დასკვნაში არ დევს. მიმაჩნია, რომ ჩვენება, რაც ბატონმა ვარშალომიძემ მისცა, ზურაბ ბერიძეს აბსოლუტურად ამართლებს.
_ რა თქვა ვარშალომიძემ?
_ თქვა, რომ გეგმიურად ვმოქმედებდითო. ფირმებს ამ კუთხით ვერ შევამოწმებდით, რადგან შესაბამისი სამსახურები არ გვყავდაო, ხოლო ადმინისტრირების თვალსაზრისით ეს სახელმწიფოს ზემდგომი ეშელონების პრეროგატივა იყოო. აქედან გამომდინარე, ბათუმის რეგიონული სამსახურების რაიმე დანაშაულზე ლაპარაკი უკანონობაა. 

ჩოლოქი _ სარფის ახალი ავტობანი

საქართველოს მთავრობასა და აზიის განვითარების ბანკს შორის გაფორმებული ხელშეკრულების საფუძველზე, სავარაუდოდ, 2010 წლის აპრილიდან სარფი-ბათუმი-ქობულეთის მიმართულებით ავტობანის მშენებლობა დაიწყება. ამჟამად პროექტი დამუშავების პროცესშია. საქართველოს ფინანსთა სამინისტროს ინფორმაციით, მიმდინარეობს ტექნიკურ-ეკონომიკური გაანგარიშება და ამის შემდეგ ზუსტად გაირკვევა, რა ხარჯებთანაა დაკავშირებული ახალი ავტობანის მშენებლობა. ამისთვის 70 მილიონი დოლარი აქვს გამოყოფილი აზიის განვითარების ბანკს (ADB). საპროექტო სამუშაოებს საქართველოს საავტომობილო გზების დეპარტამენტი ახორციელებს. 
წინასწარი პროექტის მიხედვით, ბეტონის საფარიანი გზა ჩოლოქიდან დაიწყება, 500 მეტრის დაშორებით გვერდს აუვლის ისპანის ნაკრძალის ტერიტორიას, შემდეგ გაივლის ოჩხამურს, ხუცუბანსა და ბობოყვათს, ჩაქვში კი გვირაბს შეუერთდება. 
საქართველოს საგზაო დეპარტამენტის აჭარის რეგიონული ხელმძღვანელის _ ელგუჯა ლომინეიშვილის ინფორმაციით, მოსახლეობაზე კომპენსაცია საბაზრო ღირებულების მიხედვით გაიცემა. სავარაუდოდ, მეორე საჯარო შეხვედრაზე, რომელიც 25 ივნისსაა დაგეგმილი, სრული პროექტი იქნება წარმოდგენილი და ზუსტად გადაწყდება, რამდენ ოჯახს მოუწევს ახალი ავტობანის გამო საცხოვრებელი ადგილის შეცვლა.  
ტენდერი ტექნიკური სამუშაოების შესასრულებლად სექტემბერში გამოცხადდება. პირველ ეტაპზე მხოლოდ ახალი ავტობანის პირველი თოთხმეტი კილომეტრის მშენებლობაა დაგეგმილი. მისი მშენებლობა ჩოლოქის დაუსახლებელი ტერიტორიიდან დაიწყება. 
`ავტობანი სულ რამდენ სოფელზე გაივლის, ამას წინასწარ ვერ ვიტყვით, რადგანაც განსაზღვრული არაა. ასევე უცნობია, რამდენ ოჯახს შეეხება ეს სამუშაოები, ზოგს შეიძლება საკარმიდამო ნაწილი ჩამოერთვას, ზოგს _ სახლი, ზოგს _ ყველაფერი~, _ ამბობს ელგუჯა ლომინეიშვილი.
ახალი ავტობანი, რომელიც ჩოლოქიდან სარფამდე მონაკვეთზე გაივლის, აჭარის ტერიტორიის 58 კილომეტრს მოიცავს.