უცნობის კონცერტი ბათუმში

ფოტო: ნათია როყვა 

გუშინ ~უცნობმა~, იგივე გიორგი გაჩეჩილაძემ, ბათუმში საპროტესტო კონცერტი გამართა. თეატრის მიმდებარე ტერიტორიაზე, დაახლოებით ექვსი ათასი ადამიანი იყო შეკრებილი. 
კონცერტის დაწყებამდე ოპოზიციის ნაწილი თურქეთის საბაჟოზე იმის გარკვევას ცდილობდა, თუ რატომ არ გამოატარეს აპარატურა, რომლითაც ტელეკომპანია მაესტროს ბათუმში მიმდინარე კონცერტი პირდაპირ ეთერში უნდა გადაეცა.

ჟურნალისტებთან საუბარისას `უცნობმა~ განაცხადა, რომ მისი ჯანმრთელობის მდგომარეობა რთულია, `თუმცა მაღალი სიცხისა და სისუსტის მიუხედავად უფლება არ მქონდა ბათუმში არ ჩამოვსულიყავი~. 
თბილისიდან ბათუმში ოპოზიციის ნაწილი და ქართული შოუბიზნესის წარმომადგენლები იმყოფებოდნენ. 
კონცერტი სიმღერით ზურაბ მანჯავიძემ გახსნა, შემდეგ ნინი ქარსელაძე, ზურაბ დოინჯაშვილი და ~ქუჩის ბიჭები~ ჩაენაცვლა...

გუშინ ~უცნობმა~, იგივე გიორგი გაჩეჩილაძემ, ბათუმში საპროტესტო კონცერტი გამართა

გადაღებულია ბათუმში უცნობის კონცერტის დროს

გადაღებულია უცნობის კონცერტის დროს

უცნობის კონცერტი ბათუმში

მანქანიდან გადმოსული ~უცნობი~სცენისკენ

შიმშილობა ციხეში კარავში და...

 ნარგიზ კაიკაციშვილი, შიმშილობის, მე–14 დღე კარავში

ფოტო; ნათია კოპალიანის

~თუ ჩემი ძმა არ შეწყვეტს შიმშილობას, ბავშვთან ერთად შიმშილობას პროკურატურის წინ მეც დავიწყებ~ _ ამბობს `ბათუმელებთან~ განსასჯელი ნათია შალიკაშვილი. ნათია და მისი ოჯახის წევრები ციალა ბაკურიძის დაყაჩაღებაში არიან ბრალდებულები. 

ნათია როყვა

~ოპერატიული ზარის საფუძველზე დაკავებულია ნათია შალიკაშვილის ყაჩაღობრივი წრე და ჯგუფის წევრები~, _ წერია საბრალდებო დასკვნაში. შალიკაშვილთან ერთად დააკავეს მისი ძმა, თენგო და ქმარი, ნოდარ შანიძე. მოგვიანებით კი სისხლის სამართლის საქმე აღიძრა ნათიას დედის წინააღმდეგ, `სიცოცხლის ხელყოფის მუქარით~ _ მანოლი დარჩიაშვილს მოწმის მოსყიდვა ედება ბრალად. მას ერთიდან სამ წლამდე, ხოლო მის შვილებს 8-დან 12-წლამდე პატიმრობა ელოდებათ. 
ნათია რვა თვის ორსული იყო და წინასწარი პატიმრობიდან ამის გამო გამოძიების მიმდინარეობისას გაათავისუფლეს. გასულ თვეში მას შვილი გაუჩნდა, ახალშობილის დედა განაჩენის მოლოდინშია. ბოლო სასამართლო პროცესი 21 მაისს გაიმართება. მანამდე კი თენგო შალიკაშვილმა ციხეში შიმშილობა დაიწყო. იგი ციხეში სახალხო დამცველის წარმომადგენლებმა ორშაბათს მოინახულეს. 
ლადო მგალობლიშვილის ინფორმაციით, პატიმარი შიმშილობით უკანონო გამოძიებას აპროტესტებს და სასამართლოს გამამართლებელ გადაწყვეტილებას ამ ფორმით ითხოვს. მოშიმშილე პატიმარი საკანში მარტოა და მის ჯანმრთელობის მდგომარეობას, როგორც სახალხო დამცველის წარმომადგენელი ამბობს, ექიმები აკონტროლებენ.  

საავადმყოფოდან საკანში...

კიდევ ერთი ადამიანი, პაატა კაიკაციშვილის დედა, ნარგიზი, შვილის უკანონო პატიმრობას ქობულეთის გამგეობის შენობის წინ აპროტესტებს. შიმშილობის დაწყებიდან მე-10 დღეს ნარგიზ კაიკაციშვილი გულის შეტევით ქობულეთის რაიონულ საავადმყოფოში მოათავსეს. კაიკაციშვილი სამედიცინო დაწესებულებაში 16 მაისს საღამოს 8 საათზე სასწრაფო დახმარების მანქანით გადაიყვანეს. საავადმყოფო კი მან 18 მაისს, დღის პირველ ნახევარში, ექიმების წინააღმდეგობის მიუხედავად დატოვა და ისევ ქობულეთის გამგეობის წინ კარავში დაბრუნდა. ნარგიზ კაიკაციშვილმა უვადო შიმშილობა შვილის პატიმრობიდან გათავისუფლების მოთხოვნით დაიწყო. დედას მიაჩნია, რომ მისი შვილი უკანონო პატიმარია. 
კაიკაციშვილის პატიმრობას მისი ნათესავებიც აპროტესტებენ და აქციებს აწყობენ. 15 მაისს ქობულეთში, აღმაშენებლის ქუჩაზე მიმდინარე საპროტესტო აქცია პოლიციამ ძალის გამოყენებით დაშალა. აქციის დაშლას აჭარის შინაგან საქმეთა სამმართველოს უფროსის მოადგილე _ რამაზ გვარჯალაძე ხელმძღვანელობდა და პოლიციის თანამშრომლებს მითითებებს აძლევდა. 
აქციას მოძრაობა `ერთიანი საქართველოს~ ლიდერი _ ზურაბ ნოღაიდელი უწევდა ორგანიზებას. აქციის მონაწილეები აჭარის შინაგან საქმეთა სამმართველოს უფროსთან, ირაკლი მოწყობილთან შეხვედრას ითხოვდნენ. პაატა კაიკაციშვილის და, თამუნა კაიკაციშვილი პროტესტის ნიშნად სამანქანე გზაზე დაწვა. შინაგან საქმეთა სამმართველოს უფროსის მოადგილემ ზურაბ ნოღაიდელს პირობა მისცა, რომ პაატა კაიკაციშვილის დას, თამუნას ირაკლი მოწყობილი შეხვდებოდა. 
თამუნა კაიკაციშვილი: ~შეხვედრისთვის შეთანხმებულები ვიყავით, მეორე დღეს, 11 საათზე, მაგრამ მოწყობილი არ შემხვდა~. კითხვაზე, თუ რატომ ითხოვენ კონკრეტულად ირაკლი მოწყობილთან შეხვედრას, თამუნა კაიკაციშვილი პასუხობს: `პაატა მისი დაჭერილია და იმიტომ~. 
პაატა კაიკაციშვილი გასული წლის დეკემბერში დააკავეს. სამართალდამცავების ვერსიით მას დიდი ოდენობით ნარკოტიკი ამოუღეს. ოჯახის ახლობლებისა და თვითმხილველების თქმით კი, დაკავების პროცესში პაატა კაიკაციშვილს სასტიკად სცემეს და ნარკოტიკიც პოლიციამ ჩაუდო. 
პაატა კაიკაციშვილი ყოფილი პრემიერის _ ზურაბ ნოღაიდელის მეუღლის დეიდაშვილია. დაკავებულის ნათესავები მიიჩნევენ, რომ პაატა კაიკაციშვილი პოლიტპატიმარია. მას განაჩენი 5 დღეში გამოუტანეს და შვიდი წლით პატიმრობა მიუსაჯეს. 

მიწის საკუთრების 194 მოწმაბა ერთ დღეში

ხელვაჩაურის საკრებულოს საკუთრების უფლების აღიარების კომისიამ, საპრეზიდენტო არჩევნების წინ, დღეში 194 (საათში _ 25) საკუთრების მოწმობა გასცა. არჩევნების შემდეგ კი ერთი აქტით იმავე კომისიამ საკუთრების მოწმობა 125 მოქალაქეს გაუუქმა. მოქალაქეებს შორის წარმოქმნილი დავების გამო დამატებით კიდევ ორასამდე ადამიანს გაუუქმდა საკუთრების მოწმობა.

ნათია როყვა 

`2007 წლის 30 ნოემბრიდან 2008 წლის 1 იანვრამდე დაახლოებით 4268 საკუთრების უფლების მოწმობა გაიცა~ _ ამ დოკუმენტს, რომელიც `ბათუმელებს~ საქართველოს ახალგაზრდა იურისტთა ასოციაციის აჭარის ფილიალმა (საია) მოგვაწოდა, ხელვაჩაურის საკრებულოს თავმჯდომარე _ როინ მალაყმაძე აწერს ხელს. 
საია-ს იურისტი _ გია ქარცივაძე აცხადებს, რომ ერთი თვის განმავლობაში 4268 საკუთრების უფლების მოწმობის გაცემა შეუძლებელია. `კანონი `ფიზიკური და კერძო სამართლის იურიდიული პირების მფლობელობაში არსებული მიწის ნაკვეთზე საკუთრების უფლების აღიარების შესახებ~ ითვალისწინებს ფორმალურ წარმოებას. ფორმალური წარმოება ზოგადი ადმინისტრაციული კოდექსის თანახმად, მოცულობით ძალიან დიდია, რაც იმას ნიშნავს, რომ უნდა დაიკითხოს მოწმეები, უნდა დათვალიერდეს შემთხვევის ადგილები და დაინტერესებულ მხარეებს უნდა მიეცეთ საკუთარი მოსაზრებებისა და შუამდგომლობების წარდგენის შესაძლებლობა. განხილვამდე საკითხი უნდა იქნას შესწავლილი~. 
აჭარის საია-ს რამდენიმე ადმიანმა მიმართა საკუთრების უფლების დასაცავად. ამ საქმეებს ხელვაჩაურის რაიონული და სააპელაციო სასამართლოები განიხილავენ. 
კითხვაზე, რამდენად რეალურია ერთ თვეში 4268 საკუთრების უფლების მოწმობის აღიარება, კომისიის თავმჯდომარე _ როინ მალაყმაძე პასუხობს: `რეალობაა იქედან გამომდინარე, რომ წინასაარჩევნოდ უწყვეტი რიგი იყო, ამიტომ კომისია საღამოს 11, 12 და პირველ საათამდეც მუშაობდა~. 
ხელვაჩაურის მუნიციპალიტეტის საკრებულოს საკუთრების უფლების აღიარების კომისიაში განსახილველად ყოველდღიურად 20-30 განცხადება ახლაც შედის. მოქალაქეები მიწის დაკანონებას ითხოვენ. ამ დროისთვის დაახლოებით 1500 განცხადებაა შესული. 
2008 წლის დეკემბრიდან დღემდე კი 370 საკუთრების უფლების აღიარების მოწმობაა გაცემული, ხელვაჩაურის მუნციპალიტეტის საკრებულოს საკუთრების უფლების აღიარების კომისიის მიერ.  
ადამიანი, რომელსაც მიწის ნაკვეთის დაკანონება სურს, კომისიაში წარსადგენად განცხადებას წერს. განცხადებას თან უნდა ახლდეს პირადობს მოწმობის ქსეროასლი, ასევე საჯარო რესტრიდან ამონაწერი, რომ ამ ტერიტორიაზე არ არსებობს გადაფარვა, საკადასტრო ნახაზი, მოწმეთა ჩვენებები. კომისია ვალდებულია განცხადება განიხილოს და საკითხი ექვსი თვის განმავლობაში გადაწყვიტოს. 
თუ ექვსი თვის განმავლობაში განმცხადებელმა პასუხი ვერ მიიღო, ეს იმას ნიშნავს, რომ მისი განცხადება კომისიამ არ დააკმაყოფილა. 
კომისიის თავმჯდომარის _ როინ მალაყმაძის ინფორმაციით, ყოველ კვირაში კომისიის სხდომები თემების მიხედვით ტარდება. `კომისიის ერთ სხდომაზე დაახლოებით ასი განცხადება განიხილება. ყველა ნაკვეთი ადგილზე გასვლით მოწმდება, დგება დათვალიერების აქტი~. 
კომისიამ შესაძლოა 80-დან 20 განცხადებაზე მიიღოს გადაწყვეტილება. სამ-ოთხკაციანი ჯგუფი ამოწმებს განცხადებაში მითითებულ მიწის ნაკვეთს და ამის შემდეგ ხდება მისი აღიარება. 
ზედა ახალშენში, სოფელ ხეყრუში მცხოვრებმა თემურ თურმანიძემ ხელვაჩაურის მუნიციპალიტეტის საკრებულოს საკუთრების უფლების აღიარების კომისიას შესაბამისი განცხადებები ორ, განცალკევებით მდებარე ნაკვეთებზე წარუდგინა. იგი ამ ნაკვეთების დაკანონებას ითხოვდა. აქედან ერთ მიწის ნაკვეთზე საცხოვრებელი სახლი დგას. თურმანიძეს საკუთრების უფლების აღიარების მოწმობა იმ ნაკვეთზე მისცეს, რომელზედაც სახლი არ დგას. მეორე ნაკვეთის საკუთრების აღიარებასთან დაკავშირებით, როგორც თურმანიძე ამბობს, პასუხი დღემდე ვერ მიიღო: `ორივე განცხადება ერთნაირი იყო, ერთი დააკმაყოფილეს, მეორე _ არა. როინ მალაყმაძესაც შევხვდი, კიდევ ვის უნდა მივმართო?~
როინ მალაყმაძის განმარტებით, თემურ თურმანიძემ კომისიას უნდა მიმართოს, კონკრეტულად კი კომისიის თავმჯდომარეს: `მოგვმართოს ჩვენ და თუ რაიმე გაურკვევლობაა, აუცილებლად გავარკვევთ. მე არ მახსოვს ჩემთვის, როგორც კომისიის თავმჯდომარისთვის, თურმანიძეს მოემართოს~. 

დაკავებული მოსამართლე ბრალდებას უარყოფს

ფულის გამოძალვაში ბრალდებულ, ბათუმის საქალაქო სასამართლოს მოსამართლე მერაბ კოზმავა ამჟამად გლდანის მერვე საპყრობილეშია მოთავსებული. მისი ადვოკატის, ავთანდილ ბუცხრიკიძის ინფორმაციით, მოსამართლე გენერალურმა პროკურატურამ ოპერატიული იფორმაციის საფუძველზე, ბათუმის სასამართლოს შენობაში დააკავა. ადვოკატი კატეგორიულად უარყოფს გავრცელებულ ინფორმაციას იმის შესახებ, რომ თითქოს ქრთამი მოსამართლეს ადვოკატმა გადასცა.

ფოტოზე: მოსამართლე  მერაბ კოზმავა

~ადამიანი, რომელმაც სამართალდამცავებს უთხრა, რომ მოსამართლეს თითქოს სამი ათასი დოლარი გადასცა ქრთამის სახით, არც ადვოკატია და არც ბრალდებულის ნათესავი. ეს ინფორმაცია არ შეესაბამება სიმართლეს. ბატონი მერაბი აპირებს ითანამშრომლოს გამოძიებასთან~.
შსს ოფიციალური ინფორმაციით, `კონსტიტუციური უსაფრთხოების დეპარტამენტისა და საქართველოს მთავარი პროკურატურის თანამშრომლებმა ერთობლივად გატარებული ოპერატიული და საგამოძიებო ღონისძიებების შედეგად, დააკავეს მოსამართლე მერაბ კოზმავა, რომელმაც განსასჯელის ახლობელს სასჯელის შემსუბუქების სანაცვლოდ, ქრთამის სახით 3000 აშშ დოლარი გამოსძალა~.
არსებობს თუ არა ვიდეო ან აუდიო ჩანაწერი, რაც ადასტურებს რომ მოსამართლემ ქრთამი აიღო, ადვოკატი პასუხობს: `მტკიცებულება იმისა, რომ მოსამართლემ აიღო ფული არ არსებობს, ყოველ შემთხვევაში ამის შესახებ არც მე და არც დაკავებულმა არ ვიცით. შესაძლოა, გამოძიებას აქვს~. 
მოსამართლის ადვოკატი ამბობს, რომ სამართალდამცავებმა ოპერატიული ინფორმაცია მერაბ კოზმავას შესახებ მარტის თვეში მიიღეს, 6 მაისს კი სასამართლოს დარბაზში მის დაკავებას გენერალური პროკურატურა ხელმძღვანელობდა. 
დაკავების დროს, როგორც ავთანდილ ბუცხრიკიძემ თქვა, `მოსამართლე ტელეფონით მე დამიკავშირდა, მაგრამ ბათუმში ჩამოსვლა ვერ შევძელი. ამიტომ ჩხრეკას ბათუმელი ადვოკატი დაესწრო, რომელსაც ასევე მოსამართლე მერაბ კოზმავა დაუკავშირდა~.
ბათუმელი ადვოკატი ბულბული მჟავანაძე მხოლოდ მოსამართლის დაკავების დროს იცავდა მის უფლებებს, ჩხრეკას დაესწრო... შემდეგ საქმეში ავთანდილ ბუცხრიკიძე ჩაერთო და კოზმავს ინტერესებს დღემდე ის იცავს. 
როგორც ადვოკატი აცხადებს, მოსამართლე კოზმავასთვის ჩხრეკის დროს რაიმე უკანონო ნივთი ან საგანი არ ამოუღიათ: `დაკავების დროს პროცესუალური ნორმები არ დარღვეულა~. 
მოსამართლის ადვოკატის ავთანდილ ბუცხრიკიძის თქმით, გამოძიება დაკავებულს, სავარაუდოდ, დღეს დაკითხავს.
ბრალი, რომელიც მოსამართლეს წარუდგინეს განსაკუთრებით მძიმე _ თანამდებობრივი დანაშაულია და ექვსიდან ცხრა წლამდე პატიმრობას ითვალისწინებს. 
2004 წლიდან დღემდე მერაბ კოზმავას გარდა ბათუმის სასამართლოს ოთხი მოსამართლე დააპატიმრეს: ნინო ვაშაყმაძე, მურმან ხამაშურიძე, ამირან ფაღავა და თამაზ ბერიძე.
ნინო ვაშაყმაძე და მურმან ხამაშურიძეც ქრთამის აღების ბრალდებით დააპატიმრეს. ისინი ჯერ კიდევ განსასჯელები არიან. 

სატრანსპორტო შემთხვევების სტატისტიკა აჭარაში

მიმდინარე წლის სამ თვეში აჭარაში 102 საგზაო-სატრანსპორტო შემთხვევაა რეგისტრირებული, რომლის დროსაც დაიღუპა ცხრა და დაშავდა 150 ადამიანი. გასულ წელს კი, აჭარის ტერიტორიაზე 490 საგზაო-სატრანსპორტო შემთხვევის შედეგად 68 ადამიანი დაიღუპა, 778 კი _ დაშავდა. 

ნათია როყვა 

საქართველოს შინაგან საქმეთა სამინისტროს საინფორმაციო-ანალიტიკური დეპარტამენტის მიერ მოწოდებული ინფორმაციის მიხედვით, 2009 წლის იანვარში, თებერვალსა და მარტში, ტრანსპორტის მოძრაობის უსაფრთხოების ან წესების დარღვევით რეგისტრირებულია 70 დანაშაული, მათ შორის სისხლისსამართლებრივი დევნა დაწყებულია შვიდ დანაშაულზე (2008 წელს კი რეგისტრირებულია 216 დანაშაული, რომელთაგან 97-ზე სისხლის სამართლის საქმე აღიძრა).
დეპარტამენტის ინფორმაციით, 2009 წლის იანვარ-მარტში, აჭარაში ადმინისტრაციული სამართალდარღვევისთვის სახელმწიფო ბიუჯეტში 253 593 ლარი შევიდა (ჯარიმების სახით).
ამავე პერიოდში ფეხით მოსიარულეების მიმართ შედგენილია სამი საჯარიმო ოქმი, საგზაო ნიშნების დაუმორჩილებლობაზე. 
გზის გასწრივ პირუტყვის ძოვების წესების დარღვევისთვის, საპატრულო სამსახურს ასევე სამი საჯარიმო ოქმი აქვს გამოწერილი. 
გასულ წელს კი ქვეითად მოსიარულეების მიმართ შედგენილია ორი ოქმი, საგზაო ნიშნების უგულებელყოფისა და საგზაო მოძრაობის წესების დარღვევის გამო; გზის გასწრივ პირუტყვების ძოვების წესების დარღვევისთვის არავინ დაჯარიმებულა; სამართალდარღვევისთვის, რომელსაც მოჰყვა სატრანსპოტო საშუალების ტვირთის გზის ან ნაგებობის ან ადამიანის სხეულის მსუბუქი დაზიანება _ გამოწერილია ექვსი ოქმი. 
2008 წელს ჯარიმის სახით სახელმწიფო ბიუჯეტში 700 744 ლარი შევიდა. 
შს სამინისტროდან აღნიშნული საჯარო ინფორმაციის მიღებას `ბათუმელები~ თვეზე მეტ ხანს ელოდებოდა. თანაც მოთხოვნილი საჯარო ინფორმაცია შსს-მ არასრულად მოგვაწოდა. სამინისტრო არ გვაწვდის ინფორმაციას კონკრეტულად რა დარღვევები დაფიქსირდა ვიდეოთვალის მეშვეობით და რა სახის საჯარიმო სანქციები იქნა გატარებული. `დამატებით ინფორმაციას მოგაწვდით მოპოვებისთანავე~ _ წერია წერილში, რომელსაც ხელს საქართველოს შსს ინფორმაციული უზრუნველყოფისა და ანალიზის სამმართველოს უფროსი _ კ. ბროკიშვილი აწერს.